Manifeste affirmant le caractère un et divers de la langue d'Oc

O ai longtemps pensat... que soi puslèu femna de dialòg, sens concession e dins la franquesa (i a de consensus mòls que son d'enganas vertadièras). Soi anada al contact del couleitieu Prouvènço, o puslèu d'aqueles que los bailejan, e vos asseguri que soi tombada de plan naut... E totes los documents que colleccioni d'aquel mond, se los vos mostravi,vos edificarian sus sas intencions : de'n primièr s'agis d'eradicar l'occitanisme de Provença, d'i impausar una sola grafia, e de denonciar sistematicament (elegits, govèrnament...) los occitanistas coma independentistas, enemics de la Republica e vos en passi de nòstra nocivitat supausada...
Podètz ensajar pasmens de los contactar : sas adreiças son publicas, sus son sit. Vos conselhi de lor escriure. E me donaretz lo resultat. Disi aquò sens ironia, vos asseguri.
Aqui ont soi d'accòrdi amb vos, es sus sa "basa" manipulada. Aqui, segur que nos cal parlar, e i a un biais simple, es de pas dire que sèm occitanistas, e de parlar en lenga, quand avèm afaire a de mond que la parlan. Puèi de donar nòstras tòcas (per ieu, essencialament, l'ensenhament public de la lenga, e tanben lo sosten a l'escritura, a la creacion, a la preséncia dins los medias, sus la plaça publica, dins los transpòrts...). Dire e tornar dire que la lenga parlada se trufa de la grafia e per aquò li revindicar una plaça (cf. lo metro de Tolosa e sas anoncias en fr e en òc).
Sus totas aqueles consideracions, i a consensus entre la FELCO e la direccion del Felibritge. Eri a Graveson, dissabtes 22, a un collòqui sus l'òbra de Valèri Bernard. La majorala Claudeta Ocelli i venguèt legir la comunicacion del rèire-capoulié Pèire Fabre, qu'avia aguda una empacha de darrièra minuta. Tant dins la presentacion de la majorala coma dins la comunicacion de Pèire Fabre, l'unitat de la lenga dins lo respièch de sas diversas realizacions foguèt afortida. La majorala comencèt per saludar la preséncia dins lo public de mond del Felibritge cotria amb de mond de l'IEO... Aqui, òc, amb lo Felibritge, èra urgent de restablir un dialòg qu'es ara fruchos. E vos dirai qu'es ben aquel dialòg qu'enràbia los menaires del couleitièu. Mai, bon, car Daniel Olivar, me triga de saber çò que donaria una temptativa de dialòg de vòstra part. Soi prèsta a vos tirar lo capèl !
Parentèsi : se volètz recebre la letra de la FELCO, amb nòstras informacions regularas, me podètz mandar un corrièl. Trobaretz l'adreiça sul sit : http://www.felco-creo.org/mstru/contact_fr.php?filtre=etab.